聰明太太叻導演

<<聰明太太笨丈夫>>以喜鬧劇的形式係個架空現實嘅時空玩到顛, 仲啟發咗後邊 精裝追女仔 奇謀五福星, 但更好之余唔似嗰幾部有剝削女性之嫌反而更有女性獨立自主意識, 同女主角幾位兼作股東有無關係呢. 呢部戲楚原導演同班男女主係夾份出錢拍的, 所以各大靚女俊男戲份平均.
(講嘅係粵語名作, 用粵語描述更有韻味.)
楚原導演不遛係喜劇大師, 還有 玉女添丁(不是楊千嬅那部是陳寶珠演的) 72家房客等名作.
女星一個嬌, 兩個俏, 男星個個靚仔.
南紅小姐是導演的愛侶坐正女一號, 她十年如一日都做慣賢妻良母, 這是老公仔再再次訂做好角俾她. (兩人婚前後合作無間)
對應南小姐的老公係本片嘅最佳男主角張清先生, 佢負責串連, 由頭帶到尾, 放大所有細胞, 演出收放自如, 如嗰時有金像獎, 佢攞硬影帝.
方心小姐與朱江先生都一身正氣, 演一啤舉案齊眉恩愛有加嘅鴛侶, 咁又點解要偷食, 朋輩壓力啰, 不過朱生咁好男仔, 佢做過李尋歡咁經典的角色, 點會真偷食, 係俾錢女仔扮偷食咗. 當然有方小姐咁好嘅老婆中偷就真無天理啦…
之但係如果係肥肥做老婆, 咁就…絕無對沈小姐不敬, 以戲論戲, 她嗰個偷食係天公地道…哈…
馮淬帆做開好乞人憎嘅, 呢次佢呢個最衰, 居然被捉奸在床都夠膽話老婆幻覺嚟啫, 笑到肚痛, 王晶搵志偉照抄呢場做唔返咁爆笑.
曾江演最膽小又偏係最想出軌嗰個, 但佢夫人係最出名嘅艷星狄娜小姐喔, 狄小姐做到惡死能登咁(非常兇惡咁解), 仲狼過華秀只狗(傳說有個華秀公園入邊只狗好惡噶), 曾生也係放盡來做, 每次驚青之時鎮過貓王(貓王唱歌勁搖動啊嗎), 笑爆嘴啦.
楚導靈活調度, 一衆巨星個個有發揮, 楚拿手群戲, 再多人D嘅72家房客都難佢唔到, 呢次濕濕碎.
舉辦<<聰明太太笨丈夫>>免費放映的影評人選播兩段, 夏日情人 張堅庭及 求愛敢死隊王晶 模仿此片片段, 一比, 珠玉在前, 學生大敗. 可見原裝正版經典之處. 因楚導并非叫演員盡情搞嘢就拍咗咁樣, 而係鏡頭運用同場景都別出心裁加以布置, 使得喜劇威力更爆更點中笑穴.
本片結局係影評人眼中同樣大勝彭浩翔同類作<<大丈夫>>. 但我覺得彭作有其新世代現實嘅依據同無奈.
彭作向楚原版有個隱性致敬, 楚片中衆男掩飾奸情時, 用石修充當哨兵, 每30秒就沖過來報告, 各人口吻一致, 勁似打緊仗敵人就殺到咁款, 擺明扮戰蒸片, 爆笑到極.
彭片則模仿無間道警匪片, 衆偷食男好似臥底走佬, 而搵九叔個段就似探監, 回憶入邊 九叔掩護佢地成班人脫身, 又係似戰蒸中留低拼死頂住敵軍咁, 算粵語片一脈相承.